Fréttir
Heil og sæl,
Mig langar til að þakka sérstaklega „glænýjum“ foreldrum sem og öllum okkar foreldrum fyrir sveigjanleika og umburðalyndi í óvenjulegum kringumstæðum í aðlögunarferlinu. Það verður að segjast eins og er að börnin standa sig ótrúlega vel. Það er okkur hugleikið að mynda góð samskipti við foreldra. Við vonumst til að geta haldið stutta kvöldfundi í báðum húsum fyrir ykkur í byrjun október – Ef að það reynist ómögulegt þá reynum við fjarfundi með hverri deild 😊
Ég vil minna á heimasíðuna okkar, ég mæli með að þið kíkið þar inn - tjorn.is : þar má fara inn ........... til þess að komast inn og fá smá innsýn í okkar heim. Einnig erum við með síðu á Instagram sem kallast tjarnarborgarlist. Vegna persónuverndarlaga þurfum við að fara mjög varlega í að setja inn myndir af börnunum sjálfum. Reykjavíkurborg tekur þennan þátt mjög alvarlega.
Inn á heimasíðunni má einnig finna alls konar áætlanir t.d. starfsáætlun/skóladagatal fyrir veturinn. Við erum búin að endurskrifa nýja skólanámskrá í ljósi innleiðingu nýrrar menntastefnu Reykjavíkurborgar : sjá nánar á menntastefna.is – Námskráin er í yfirlestri hjá Kristínu Karlsdóttur sem er prófessor í leikskólakennarafræðum í HÍ – Þegar hún hefur lokið lestrinum tekur foreldraráð við og gefur umsögn. Að lokum fer hún upp í hendurnar á Kristínu okkar Pétursdóttur sem er grafískur hönnuð – Hún ætlar að ramma hana inn í fallegt form fyrir okkur. Ég hlakka til þess að fara yfir námskrána með ykkur kæru foreldrar.
Mikil festa hefur verið í starfsmannhópnum í gegnum árin og verður svo áfram að mestu leyti. Tjarnarborgarmegin eru þó þær breytingar að Momoko sem er grunnskólakennari og BA í íslensku ásamt Arney sem er ballettkennari (fyrir yngstu börnin) hafa bæst við blómin inn á Læk. Fjóla sem er Þroskaþjálfi og listmeðferðafræðingur er búin að vera hjá okkur síðan í sumar. Hún starfar sem sérkennari. Við erum himinlifandi með nýju kennarana okkar.
Í haust byrjum við formlega að nota svokallaða ferilmöppu í því ljósi viljum við biðja ykkur að koma með ljósmyndir af börnunum með afa og ömmu, ykkur, systkinum eða einhverjum úr fjölskyldunni. Ferilmappan á að vera samfelld, fjölbreytt og einstaklingsmiðuð þegar barn byrjar fær það sína möppu sem fylgir barninu alla skólagönguna. Í ferilmöppurnar eru settar myndir eða eitthvað sem kemur að heiman og auðvelt er að setja í möppuna sem tengir við heimili barnsins. Uppeldisfræðilegar skráningar af námi barnsins í leikskólanum ásamt listaverkum, ljósmyndum sem lýsa viðkomandi einstaklingi vel. Möppurnar eru hafðar aðgengilegar fyrir börnin þannig að þau geti skoðað þegar þau vilja.
Með kærri kveðju,
Nemendur kvaddir og tekið á móti nýjum börnum
Síðasta föstudag hættu mörg börn hjá okkur í leikskólanum Tjörn og hefja þau grunnskólagöngu á næstu dögum. Það er erfitt að kveðja börn og fjölskyldur þeirra en ánægjulegt að horfa á eftir þeim tilbúin að takast á við næsta skólastig
Nú er komið að aðlögun nýrra barna og eru að koma ný börn inn á allar deildir leikskólans. Aðlögunarferlið er með breyttu sniði vegna sóttvarna og fer aðlögun fram að miklu leyti úti.
