Haldið er upp á afmæli barnanna.  Leikskólinn býður upp á veitingar.  Afmælisbarnið fær kórónu, afmælisdisk og glas og heiðurssæti í söngstund.  Þar fær afmælisbarnið að velja jafn mörg lög og aldur þess segir til um. 

Ef einhverjir vilja bjóða börnum úr leikskólanum í afmælisveislu heim fer það boð hvorki í gegnum leikskólann né með boðskortum í hólf barnanna.  Þessi boð eiga að fara fram á milli foreldra.

Uppeldissýn leikskólanna er að leitast við að rækta með hverjum og einum þá hæfileika sem munu nýtast viðkomandi best í nútímasamfélagi.
Því teljum við að nauðsynlegt sé að styrkja jákvæða sjálfsmynd barnanna,félagslega hæfni og trú á þeirra eigin getu.
Einkunnarorð okkar eru frumkvæði, vinátta og gleði.

Leikskóladagurinn er mjög fjölbreyttur og því nauðsynlegt að leikskólabarnið sé vel útbúið. Barnið þarf alltaf að vera með hlý föt og aukaföt í leikskólanum.  Í körfum og kössum fyrir ofan hólf er nauðsynlegt að hafa auka vettlinga, hlýja sokka og auka innifatnað t.d. nærföt, buxur,boli og sokka.  Réttur skófatnaður er einnig nauðsynlegur. Stígvél og kuldaskór fyrir bleytu og snjó og þægilegir léttir sumarskór á sumrin sem barnið á auðvelt með að fara í og úr 

Nauðsynlegt er að allt sé vel merkt með nafni barnsins.   Á föstudögum þurfa foreldrar að tæma öll hólf og snaga vegna þrifa.  Athugið að yfirfara þarf fatnað yfir helgina og koma með hrein föt í leikskólann á mánudögum.  Einnig óskum við eftir því að töskur og pokar séu geymd heima. 

Formleg foreldraviðtöl eru í febrúar/mars, en foreldrum er velkomið að hafa samband hvenær sem er ef þeim liggur eitthvað á hjarta. Boðið er upp á túlkaþjónustu fyrir þá sem þess óska. 

Í Tjörn hafa ýmsar uppákomur skapað sér sess. Tilbreytingar í daglegu lífi eru fyrst og fremst hugsaðar til skemmtunar og gleði fyrir börnin, starfsfólkið og foreldrana, auk þess að halda að börnunum íslenskum siðum og venjum.

Afmæli barnanna  Haldið er upp á afmæli barnanna í Tjörn með ýmsu móti. Afmælisbarnið fær kórónu og skreytir hana, það velur lögin í söngstundinni, jafnmörg og aldur barnsins segir til um.  Afmælissöngurinn er auðvitað sunginn og afmælisbarnið fær sérstakan afmælisdisk og glas. Í leikskólanum eru bakaðar sérstakar afmælisbollur sem börnin fá í kaffitímanum.

Foreldrakaffi Á aðventunni og á vorin mæta foreldar með börnin í leikskólann, staldra við og fá sér kaffi og meðlæti.

Þorrablót Að fornum sið er haldið upp á þorrann. Hefð er fyrir því að börnin búi sér til víkingahorn, þorraþræll sunginn af mikilli rausn og hádegisverður er framreiddur þar sem boðið er upp á þjóðlega rétti.

Bolludagur  Á bolludag baka börn og fullorðnir bollur, brauðbollur og vatnsdeigsbollur. Hefð er fyrir því að hafa fisk- eða kjötbollur í hádegismat.

Sprengidagur  Tjörn heldur í gamlar hefðir á sprengidag með því að bjóða upp á saltkjöt og baunir.

Öskudagur  Hefð er fyrir öskudagsskemmtun í Tjörn. Börnin koma í búningum ef þau vilja. Öskudagsball er f.h. þar sem "kötturinn" er sleginn úr poka sem inniheldur glaðning fyrir börnin. Eftir það er dansað og farið í leiki.

Sinfóníuhljómsveit Íslands Á hverjum vetri býður Sinfóníuhljómsveit Íslands elstu börnunum á tónleika í Hörpu.

Umferðarskólinn Á vordögum heimsækir umferðarskólinn elstu börnin.

Sveitaferð  Hefð er fyrir sveitaferð á vorin sem foreldrafélagið skipuleggur og er öllum foreldrum boðið með. Undanfarin ár hefur verið farið að Bjarteyjarsandi í Hvalfirði.

Útskrift elstu barnanna Hátíðleiki ríkir þennan dag.  Börnin fá útskriftarskírteini þar sem m.a. kemur fram að 1.skólastiginu er lokið.  Börnin búa sjálf til útskriftarhatta og fá rós að gjöf. 

Útskriftarferð í Viðey Í júní fer útskriftarhópurinn í ferð út í Viðey. Þar förum við í leiki, grillum o.fl.

Sumarhátíðin Sumarhátíð foreldrafélagins er haldin til skiptist í garði Tjarnarborgar og Öldukots.  Börnin aðstoða við að skreyta garðinn, við förum í skrúðgöngu og foreldrar mæta með veitingar á hlaðborð.  Einnig fáum við til okkar góða gesti sem skemmta okkur ýmist með söng eða sprelli.

Sumarferðir Í júní og júlí falla skipulagðir hópatímar af dagskrá, en í staðinn er meiri áhersla lögð á útivist og vettvangsferðir.

Dagur íslenskrar tungu 16.nóvember er dagur íslenskrar tungu og fæðingardagur Jónasar Hallgrímssona . Þann dag læra börnin eitt og annað úr smiðju afmælisbarnsins. 

Jólahefðir  Áherslan á aðventunni er að njóta og eiga skemmtilegar stundir saman.

Piparkökubakstur Jólaundirbúningur  barnanna hefst með piparkökubakstri, fylgir því mikil gleði og stemming. Allir taka þátt í bakstrinum, stórir og smáir.

Föndurdagur er haldinn í byrjun aðventu. Þá er foreldrum, systkinum og öðrum aðstandendum boðið að koma í leikskólann einn eftirmiðdag. Húsinu er skipt upp í þrjú svæði. Boðið er upp á ýmsan efnivið sem tengist jólaundirbúningi í Melhúsi og Brunni. Kaffihús er starfrækt í Miðhúsi þar sem piparkökur barnanna eru á borðum ásamt jólaglögg og ávaxtasafa.

Jólaball Um miðjan desember er jólaball barnanna í leikskólanum. Dansað er í kringum jólatréð og oft kíkja góðar gestir við.  Eftir ballið er boðið upp á jólamat.  Vegna plássleysis er ballið án foreldra. 

Starfsfólk leikskólans sér ekki um að gefa börnum lyf í leik­skólanum.  Flest lyf sem börn taka eru þess eðlis að hægt er að gefa þau kvölds og morgna.  Foreldrar eru því beðnir um að ráð­færa sig við lækni og fá lyfja­gjöfinni hæg­rætt með til­liti til þess.

Í Tjörn er eldaður matur daglega og leggjum við ríka áherslu á að fæðið sé fjölbreytt og hollt, grænmeti með öllum mat og hráefnið ferskt. Auk þess fá börnin morgunmat og síðdegishressingu. Markmið okkar er að börnin læri almenna borðsiði og kurteisi, kennari situr til borðs með börnunum og er þeim fyrirmynd.

Leikskólinn er opinn frá klukkan 7:30 - 17:00.

Leikskólanum ber að taka tillit til þess að börn eru mislangt komin í þroska og hafa mismunandi bakgrunn. Þau börn í leikskólanum sem á þurfa að halda fá sérkennslu. Komi upp grunur um frávik hjá barni er í samráði við foreldra haft samband við sérfræðing um frekari greiningu. Fagleg ráðgjöf og greining kemur frá Þjónustumiðstöð Vesturbæjar, Vesturgarði en þar starfa félagsráðgjafi, leikskólaráðgjafi, sálfræðingur og sérkennsluráðgjafi. Markmið með sérkennslu er að hvert barn fái notið sín á eigin forsendum eftir aldri, þroska og þörfum. Gerðar eru einstaklings-námsskrár fyrir þau börn sem þurfa sérkennslu.

Ef óhöpp eiga sér stað er hringt í foreldra og/eða farið á heilsugæslustöð. Því er mikilvægt að láta vita ef símanúmer eða heimilisfang breytist.

Leikskólinn er lokaður í fjórar vikur samfellt á tímabilinu 1. júní til 31. ágúst.  Lokunartími verður ákveðinn að undangenginni skoðanakönnun meðal foreldra í hverjum leikskóla en oftast hefur raunin orðið sú að sumarlokum hefst í annarri eða þriðju viku júlímánaðar.

Veik börn eru heima og eftir veikindi er möguleiki á að vera inni einn til tvo daga, ef aðstæður í leikskólanum leyfa.