Börnin hafa ríka þörf fyrir að hreyfa sig frjálst og hreyfing stuðlar að andlegri og líkamlegri vellíðan. Leikir og daglegar athafnir styrkja fín og grófhreyfingar barnsins. Barnið notar smærri vöðva til að lita, mála, klippa, byggja úr kubbum, klæða brúðu og þræða perlur. Samhæfing augna og handa eflist og barnið á auðveldara með t.d. að smíða, kasta og grípa. Leikir sem reyna stærri vöðva líkamans og grófhreyfingar eru t.d. þegar barnið skríður, hoppar, hleypur, sparkar bolta og klifrar.

Markmið:

• að börnin fari út einu sinni á dag og kynnist íslenskri veðráttu
• að fullnægja hreyfiþörf barnanna
• að efla gróf- og fínhreyfingar þannig að barnið öðlist örugga stjórn á líkama sínum

Leiðir:

Hreyfing tengist öðrum námssviðum eins og tónlist, myndlist og umhverfi og náttúru. í Tjörn er salurinn okkar notaður í hreyfiuppeldi. Þar eru klifurgrind, dýnur, boltar o.fl. Og gleymum ekki stigunum! Þeir eru gott tæki til að örva hreyfiþroskann.
Börnin fara út á hverjum degi, yngri börnin fyrir hádegi, þau eldri eftir hádegi. Útiveran er misjafnlega löng eftir árstíðum, veðri og vindum.
Í útiveru fá börnin hreyfingu og útrás og þar hafa þau frelsi til að hreyfa sig með rýmri hætti en inni. Þau kynnast því hvernig umhverfið breytist eftir árstíðum. Í vettvangsferðum förum við í lengri eða styttri gönguferðir.