Leikskólinn Öldukot var vígður 27. janúar 1989 og var hann þá einn af þremur leikskólum sem rekinn var af Landakotsspítala. Á þeim tíma þótti mikilvægt fyrir starfsemi spítala að reka leikskóla fyrir börn starfsmanna sinna. 1. september 1999 yfirtóku Leikskólar Reykjavíkur rekstur leikskólans. Í Öldukoti er leikskólarými fyrir 43 börn. Leikskólinn skiptist í tvær deildir. Á yngri deildinni eru 20 börn og þeirri eldri eru 23 börn. Stöðugildi skólans eru 10 þar af 1 í stjórnun og 1 í eldhúsi. Leikskólinn er til húsa að Öldugötu 19. Húsið er 308 fm. Þetta hús reisti Þorleifur Eyjólfsson 1930. Húsið er byggt sem einbýlishús en hefur verið aðlagað eftir kostum að starfssemi leikskólans. Það er þrjár hæðir, Á efstu hæð er eldri deildin, Melhús.  Á miðhæð er yngri deildin staðsett, þ.e. Miðhús, kaffistofa starfsfólks og eldhúsið. Í kjallara eru fataklefar fyrir báðar deildir, lítill salur, undirbúningsherbergi og geymslur. Útileiksvæðið sem leikskólinn hefur til afnota er garðurinn á bak við húsið. Því til viðbótar nýtum við opin svæði í kringum leikskólann. Öldukot er í næsta nágrenni við miðbæ Reykjavíkur. Frá Öldukoti er stutt að fara á ýmis opin svæði fyrir almenning, s.s. Hljómskálagarð, Landakotstún, Tjörnin, Höfnina og svo mætti lengi telja. Ýmis söfn og menningarhús eru í seilingarfjarlægð og leikskólinn liggur vel við strætóleiðum.